Homiletic Fragment I

Verse Indeterminate Saxon

sorh cymeð
manig ond mislic in manna dream.
Eorl oðerne mid æfþancum
ond mid teonwordum tæleð behindan,

5

spreceð fægere beforan, ond þæt facen swa þeah
hafað in his heortan, hord unclæne.
Byð þonne þæs wommes gewita weoruda dryhten.
Forðan se witiga cwæð:
"Ne syle ðu me ætsomne mid þam synfullum

10

in wita forwyrd, weoruda dryhten,
ne me on life forleos mid þam ligewyrhtum,
þam þe ful smeðe spræce habbað,
ond in gastcofan grimme geþohtas,
gehatað holdlice, swa hyra hyht ne gæð,

15

wære mid welerum." Wea bið in mode,
siofa synnum fah, sare geblonden,
gefylled mid facne, þeah he fæger word
utan ætywe. ænlice beoð,
swa ða beon berað buta ætsomne

20

arlicne anleofan, ond ætterne tægel
hafað on hindan, hunig on muðe,
wynsume wist. Hwilum wundiaþ
sare mid stinge, þonne se sæl cymeð.
Swa bioð gelice þa leasan men,

25

þa ðe mid tungan treowa gehataþ
fægerum wordum, facenlice þencaþ,
þonne hie æt nehstan nearwe beswicaþ,
hafað on gehatum hunigsmæccas,
smeðne sybcwide, ond in siofan innan

30

þurh deofles cræft dyrne wunde.
Swa is nu þes middangeard mane geblonden,
wanað ond weaxeð. Wacað se ealda,
dweleð ond drefeð dæges ond nihtes
miltse mid mane, mægene getryweð,

35

ehteð æfestra, inwit saweð,
nið mid geneahe. Nænig oðerne
freoð in fyrhðe nimþe feara hwylc,
þæt he soðlice sybbe healde,
gastlice lufe, swa him god bebead.

40

Forþan eallunga hyht geceoseð,
woruld wynsume, se ðe wis ne bið,
snottor, searocræftig sawle rædes.
Uton to þam beteran, nu we bot cunnon,
hycgan ond hyhtan, þæt we heofones leoht

45

uppe mid englum agan moton
gastum to geoce, þonne god wile
eorðan lifes ende gewyrcan!